平素祗顧吃喝玩樂，一般數拾萬元的少數開支，那管他的；但此時此刻，二仟八佰萬管理基金將被{一鋪清袋}，那裏還可置身事外？
昨日午飯後，約同左鄰右里，到屋苑內一所中學禮堂，參與特別業主大會，一開便是三小時。
與會有負責勘探維修的顧問公司、大廈管理公司，律師、互委會主席，當然還有少數出席的業主(據統計：昨日出席業主有317位，佔全苑業戶14.6%)。
今次開會目的，本來是表決贊成或反對維修工程，以及投選標書。可是通知書內容完全欠缺透明度，究竟每個維修項目費用多少？每戶要額外支付多少？日後管理費會增加多少？沒有半個數據可依。不知顧問公司及主席是沒有經驗，抑或故意想把大家蒙混過去，從中取利？
多得部份業主做足功課，多個問號，會上一一提出，過程難免有點激動，但秩序依然良好。最後由律師宣佈將會期押後，待顧問公司將數據列明，再通知下次開會時間。
其實屋苑樓齡已過二十，外牆剝落滲水，維修在所難免，祗希望主持者本著良心辦事，別把大家多年積蓄平白浪費，功德無量矣。
19 則留言:
呢d咁大嘅數字,我做銀行果時都好少見~
最平跟最貴的標書竟可相差超過一倍，真係要睇過份break down先可客觀地估量！
你好有心啊！呢啲會我通常都唔會理~
同埋哩，基金啲錢累積得多了，總會引起些麻煩。
我都開始有o的驚，聽講我o個度過年前會開會．
丁丁：
近幾年材料價格上漲，加上人工亦唔平，一般大維修工程都一定以仟萬計架。
薯嘜：
唔係咁樣，點令大家覺得二仟幾萬果間係最抵吖，純綷係顧問公司嘅掩眼法啦~
大頭：
想唔理都唔得啦，我地呢d老人家，唔拎得幾多次錢出黎架咋！
我地互委會成日俾人話歛財，又多左個反監察委員會，一向多是非，所以我平時唔會去開會囉~
lala：
你到時真係要睇清楚至好呀，維修工程個銀碼唔講得少架~~@@
唔呃你呃邊個吖，呵呵呵
我上一手主席都係因為歛財，被人叮走咗，依家呢個新主席，暫時都幾均真，所以我地都好放心！
naruto：
我俾人呃，你駛唔駛開心到唔瞓覺呀，兩點都唔瞓，神經有病~~@@
劉鄧：
其實主席都係義務工作，本來應該多謝佢地，但係有人心術不正，乘機取利就真係唔啱！
我玩scrabble上左癮，兩點係啱啱玩完
我覺得：
最平個幾間肯定工程期間要加呢加路，最終起哂資，最貴那間可能亦是最平個幾間的姊妹公司，純粹幫人開路！
都係那句，所有エ程項目、用料牌子(如有)、分期項目交費、延期交收遲款、等等....必須不要怕麻煩小心列明清楚，魔鬼一般都是藏於細節裏
naruto：
小心變熊貓眼呀~~
薯嘜：
有d街坊係行內人，佢地都話其實係幾間公司分餅仔，判上判。
錢就一定要俾架嘞，唯有希望佢地做好d啦，唉！
其實十八間入面好大機會只係幾個老闆...
咁大project真係要搵d專業同信得過既人跟先得~
萊萊：
已經有好多人跟緊，主持人今次應該唔敢亂黎~~
最尾果兩間公司據我所知是堅概…
如果是成個屋苑的維修、伍仟幾萬唔出奇（究竟你果樹有幾多幢樓？）、呢兩間都是大公司、正所謂大雞唔食細米、要佢地同人鬥平爭生意係無可能、點解會貴咁多呢、或者講其它公司平咁多、除開物料成本、大公司在監管方面會做得比較好、例如科文會是比較有經驗（人工高的！）、人數足的、跟野會跟得緊的、工人的技術會好的（請多的大工）、工時會合理的；相反細公司點解會平的、一方面請少的大工、用多的中工同細工、二來儘可能縮短工期、但求快快手攪掂（唔知重會興幸咁快手！）、質量就貴客自理、三來減省監管人員、甚至乎一人睇幾個site、本來應該日日出現的人、隔幾日至出現、甚至乎只是開工同完工至出現…
由於資料有限、我只能教你睇幾樣野：一、工期是否合理、一般外行人梗是覺得愈快攪掂愈好、但如果太過快完工未必是好事、除咗比較價錢之外、可以睇下預算工期、太短的要小心！
二、駐場科文、有無列明工程期間有幾多人員駐場、是的乜人？會唔會日日唔同？有無簽到部？有無投訴電話？有乜事起上來可以搵邊個？地盤總負責人是乜水（最好有埋專業資格！）
三、有無條文約束工人、例如規定著制服、唔著會唔會罰、唔可以講粗口（咪笑呀、的有規模的大公司是真是會規定唔可以講粗口架！）、唔可以隨地吐痰、唔可以隨處大小便、唔記得關水喉會點賠…
其實照牌面睇、我估三仟伍佰萬都走唔甩！
亞明：
好詳細，唔該晒~~
重有一樣講漏咗、就是睇埋完工後的保養期、當然愈長愈好、不過通常都是同價錢成正比！同樣、保養期太短要小心、分分鐘變咗關人個關。
我初初都以為個主席係義務，但後尾睇番個財政報告，原來佢每個月有出番一筆叫做車馬費ge錢，你話佢係咪......
劉鄧：
我地果個都好似有出車馬費喎，等我下次睇清楚份報告先~
發佈留言